【自己一個吃喝玩樂好出奇咩？】
呢排興「獨遊」，除左興自己一個去旅行，「敢於」獨自一人係香港地吃喝玩樂都好似俾人神化左咁。其實使唔使咁誇張．．．？
無可否認，自己一條友去旅行的確係要小小勇氣，始終去到唔熟悉既地方唔多唔少都會有危險，樣樣野都要靠自己。(唔，其實自己一個去旅行又好出奇咩？)
但係只不過係香港自己一個人行街、食飯、睇戲、下午茶．．．好出奇呀？你話見到人地街裡愛侶一對對，朋友成班嘻嘻哈哈，自己弧伶伶一個需要好大勇氣去面對，但諗深一層，真係需要咁大「勇氣」咩？
當老公返左工而仔女又返哂學，老媽子咪又係自己一個人食午餐，行下街消磨時間等你地返歸，好特別咩？婆婆公公既仔仔女女結哂婚，有自己一頭家搬哂出去，孫仔孫女大個唔使再睇住個時，佢地咪又係自己一個去飲下早茶，去公園做下運動，好特別咩？夜晚放左工，屋企無飯食，臨時又搵唔到飯腳，自己一個去食餐便飯，好特別咩？打工仔中午個餐個個同事帶飯唔出去食(又或者根本唔想係休息時間再同人social)，要自己一個出去食，好特別咩？又因工作關係，朋友個個放星期六日，自己偏偏放週日，所以要自己一個人搵節目，好特別咩？單身人士身邊既死黨都蜜運中，想睇既戲朋友已經同另一半睇左要自己去睇，大時大節個個所謂有異性無人性攪到要自己一個人過，又好出奇咩？
其實自己一個吃喝玩樂唔係真係好出奇，唔需要神化左呢個舉動，需要既勇氣亦唔使好多，只係你點睇你自己做緊既野。香港地咁做，需要幾多考驗丫。說穿了，咪就係你無得揀囉。
拿，我唔排除真係有人好享受自己一個自由自在做自己想做既事。但係每樣被人棒上神枱既行為，都不妨事先諗下，查實係咪真係咁特別，又或者係咪真係需要隨波逐流，跟住去做再話俾人聽：「獨自乜乜乜去feeling awesome」唔係，係打俾人睇先岩。
接收每一個訊息時，請先讓自己一人好好過濾一下。
Blog：http://backpackersopoor.blogspot.hk/
Search